ನಾಗರಹೊಳೆ ಹುಲಿ ಸಂರಕ್ಷಿತ ಪ್ರದೇಶವನ್ನು ಈ ಹಿಂದೆ ರಾಜೀವ್ ಗಾಂಧಿ ರಾಷ್ಟ್ರೀಯ ಉದ್ಯಾನವನವೆಂಬ ಹೆಸರಿನಿಂದ ಕರೆಯಲಾಗುತಿತ್ತು. ನಾಗರಹಾವಿನ ಆಕಾರದಲ್ಲಿ ಹರಿಯುವ ಹೊಳೆಯ ಆಧಾರದಲ್ಲಿ ಈ ಅರಣ್ಯಪ್ರದೇಶಕ್ಕೆ ನಾಗರಹೊಳೆ ಎಂದು ಹೆಸರಿಡಲಾಯಿತು. ನಾಗರಹೊಳೆ ಹುಲಿ ಸಂರಕ್ಷಿತ ಪ್ರದೇಶವು ಮೈಸೂರು ಮತ್ತು ಕೊಡಗು ಜಿಲ್ಲೆಯ 847.981 ಚ.ಕಿ.ಮೀ. ಅರಣ್ಯ ಪ್ರದೇಶವನ್ನು ಒಳಗೊಂಡಿರುತ್ತದೆ. ಇದರಲ್ಲಿ ಬಫರ್ ಅರಣ್ಯ ಪ್ರದೇಶವು 204.589 ಚ.ಕಿ.ಮೀ. ಹಾಗೂ ಕೋರ್ ಅರಣ್ಯ ಪ್ರದೇಶವು 643.392 ಚ.ಕಿ.ಮೀ. ವ್ಯಾಪ್ತಿ ಹೊಂದಿರುತ್ತದೆ.

ನಾಗರಹೊಳೆಯು ಪಶ್ಚಿಮ ಮತ್ತು ಆಗ್ನೇಯ ದಿಕ್ಕಿನಲ್ಲಿ ಕಬಿನಿ ಮತ್ತು ತಾರಕ ಜಲಾಶಯಗಳು ಮತ್ತು ಬೃಹತ್ ಜಲಮೂಲಗಳನ್ನು ಹೊಂದಿದೆ.

ನಾಗರಹೊಳೆ ಹುಲಿ ಸಂರಕ್ಷಿತ ಪ್ರದೇಶದ ದಕ್ಷಿಣ ಭಾಗದಲ್ಲಿ ಕೇರಳ ರಾಜ್ಯದ ವಯನಾಡು ವನ್ಯಧಾಮವು ಇದ್ದು, ಆಗ್ನೇಯ ದಿಕ್ಕಿನಲ್ಲಿ ಕರ್ನಾಟಕ ರಾಜ್ಯದ ಪ್ರಮುಖ ಹುಲಿ ಸಂರಕ್ಷಿತ ಪ್ರದೇಶವಾದ ಬಂಡೀಪುರ ಹುಲಿ ಸಂರಕ್ಷಿತ ಪ್ರದೇಶವು ಸುತ್ತುವರಿದಿದೆ. ಇವು ಪಶ್ಚಿಮ ಘಟ್ಟದ ಅತೀ ಪ್ರಾಮುಖ್ಯತೆ ಹಾಗೂ ಜೀವ ವೈವಿದ್ಯತೆ ಹೊಂದಿರುವ ಅತ್ಯಂತ ರಮಣೀಯ ಅರಣ್ಯ ಪ್ರದೇಶವಾಗಿದ್ದು, ಪಶ್ಚಿಮ ಘಟ್ಟದ ಪ್ರದೇಶಕ್ಕೆ ಸೇರಿರುತ್ತದೆ.ನಾಗರಹೊಳೆಯು ಸಸ್ಯಹಾರಿ ಮತ್ತು ಮಾಂಸಹಾರಿ ಪ್ರಾಣಿಗಳ ಅತ್ಯಧಿಕ ಸಾಂಧ್ರತೆಯನ್ನು ಹೊಂದಿರುತ್ತದೆ. ನಾಗರಹೊಳೆ ಹುಲಿ ಸಂರಕ್ಷಿತ ಪ್ರದೇಶವು ಮಾಂಸಹಾರಿ ಮತ್ತು ಸಸ್ಯಹಾರಿ ಪ್ರಾಣಿಗಳಾದ ಹುಲಿ (Panthera tigris), ಚಿರತೆ (Panthera pardus), ಸೀಳು ನಾಯಿ ( alpinus), ಕರಡಿ ( ursinus), ಏಷಿಯನ್ ಆನೆ (Elephas maximus), ಕಾಟಿ (Bos gaurus), ಸಾಂಬಾರ್ (Rusa unicolor), ಜಿಂಕೆ (Axis axis), ಕಾಡುಕುರಿ (Muntiacus muntjak), ಚೌಸಿಂಗ (Tetracerus quadricornis), ಕಾಡುಹಂದಿ (Sus scrofa), ಕೂರ (Moschiola indica), ಹನುಮಾನ್ ಲಂಗೂರ್ (Semnopithecus hypoleucos) ಇವುಗಳನ್ನು ಹೊಂದಿರುತ್ತದೆ.